Literatür dîn el Glheþ Talossán

From TalossaWiki
Jump to: navigation, search

Poesía és Canziuns

La Camina Q'esteva Non Preindada

Par Robert Frost (Glheþinat par Ma la Mha, Baron Tepistà)

Doua caminas ziverxhevent in'iensa selva vermel
Es coitat qe non voiatxadréu sür l'embù
Es estadréu viens voiatxeir, lung ficheveu
Es risguardeveu à viens sa luegn qe povadréu
Aduve ça se tirneva ainciün la cepa;

Nhoi preindeveu l'altra, come pariliteir bela,
Es tignova salacor el miglhor revindic,
Parç qe ça füt þervös es manc'heva l'anilita;
Ivenðo per la paßaziun là
Lor tignova anilitat abúec'ht el mismeu,

Es l'embù acest morgun pariliteir mostrevent
In listopätsilor qe aucün päç tignova negriçat.
Oho, guardeveu el prüm per 'n altra ziua!
Ischù parç qe eu säps com'iens vej ducia à'iens vej,
Duviteveu schi txamáis revenadréu.

Nararhéu d'acest cün 'n sospir
Qualse'pläts ageux es ageux daincets:
Doua caminas ziverxhevent in'iensa selva, es eu —
Eu prindeveu l'iensa la mhíus voiatxada,
Es acest tignova fäts toct la ziferençù.

Chirluscha àl Glheþ

Canziun urixhinal par Robert I

Sta là, zefença
Tu vell glheþ Talossan.
Txamais praitença
Da negarh tu drept þuman!

Es ca'scu ziua,
Ár propreu glheþ parlarh;
Sovenenç' la tzara,
Talossan c'e ben d'estarh!

Va, desaverscha
Talossan sè grült traval.
Acest daßerc'ha
Ár voce naziunal!

Glheþ da Talossa,
Aprenda, parla, scriitz;
Fäts aceasta cosa,
Eda resta incognits!

Noi sint l'espereux
Dad ár ancient glheþ corteis–
Mimtenença sondreux
Toct ár cünsuetüds vischceis!

Oxhi sonora
'n pliada antalour:
"¡Crid' cadascu þora
Qe eu non sint Cestour!"

In Nazareþ

Nadalet urixhinal par Ma la Mha, Baron Tepistà

In Nazareþ, l'amarçol,
L'oratsch in Galilì,
L'artscháinxhell Gavrial
Praizirev'iens idilì

O veneva à María,
La minim fiançada
D'Ups del Davíu sè ca,
Es zireva, "Non trembla."

O zireva, "¡Graitinds à thu!
¡El Domnul isch cün dtu!
Nascarhás 'n figlheu.
Lo nominarhás Iesu.

"Tu isch zilact par Díeu.
Tu pruostoc'h serà grült.
Toct Lo nominarhent
El Figlheu del Pü Inalt.

El þroneu da Davíu
Díeu zonarha à Lo.
Es sür del ca da Txec
Àl fim röinarha-t-O."

María, a l'as'cheva:
"¿Com'éu put nascarh?
Cair eu sint 'n vierxha;
Non tignoveu procriat."

L'áinxhell la rezireva:
"El Spritz Sant ischà.
Par el pevarh del Díeu
Tu serás suvelada.

"L'iens qi serà pronaveu
Nominarha el figlheu
Da Dhíeu Steçéu.
Toct isch pouçival cün Díeu.

"C'e vräts qe tu sangeiça
Erschéveþ nascarha
In sieu anosità,
Ischù steril esteva."

María lo zireva:
"Sint-éu la famul.
Qe c'estadra à mhe
Com'el pedit del Domnul."

Es osprei noua mesen
Del nic'ht in Galilì
Pastours üscüdevent
Del Meschic'ha, 'n idilì,

Quand toct da Sieu creaziun
Es Gavrial sè cor
Es coras celestiais
Proclamevent Sieu amor.