El Respuns

glheþinescu par Iustì Canun

Dwar Ev maravetxösmint lutscheva la conectaziun final cün or. Els uglhen d'iensa dudeschaina da cámeras televiziunais lo risguardevent es el subeþér utvarpeva 'n dudeschaina da bildeux da qet o façeva.

Rumischeva es adnuteva à Dwar Rejn, es moveva à'iensa posiziun adelmás el comütateir qi veneva compiaçarh el contäcts quand o en fermeva. El comütateir veneva conectarh, strax, toct i computeschti monströsen da toct i eraticas populiçadas in l'ünivirs—noueinçe-sex miglhiard d'eraticas—ainciün el supercircuiteu qi veneva conectarh-lor toct ainciün viens supercalcülateir, viens máqineu cüvernetic qi veneva combinarh toct i säp da toct i galaxías.

Dwar Rejn parleva brevamint àls biglhiuns qi risguardevent es auscultevent. Es osprei 'n momaintsch da silençù o zireva, "Nun, Dwar Ev."

Dwar Ev fermeva el comütateir. Hi füt 'n frestonaziun grült, la cjaina del pevarh da noueinçe-sex miglhard d'eraticas. Els luschti estinçelevent es subticeschevent lalunga del scumpart qi miaschüreva muitas milas.

Dwar Ev veneva arüc espierducheva 'n and grült. "El þonör d'ascarh la fraga prüma isch el tu, Dwar Rejn."

"Meirci," zireva Dwar Rejn. "Ça serà 'n fraga qi aucün máqineu cüvernetic singul tent pevescu respúnsarh."

O inverseva per fáçarh àl máqineu. "¿Ja'iens Dïeu?"

La voce alvaldour respunseva sanc retractat, sanc clicarh d'iens rilè singul.

"Üc, nun ja'iens Dïeu."

El pör süftanéu estinçeleva sür la faça da Dwar Ev. O impeiteva per ignirarh el comütateir.

'N bolt da blitzeu del çéu nivolattä lo cünsüteva es fuçeva el comütateir fermat.