Constituziun dal Provinçù Soveran da Maricopa

This page is maintained under authority of the provincial government of Maricopa. Make no unauthorized changes.

La Verziun Angleasca

CONSTITUZIUN DAL PROVINÇÙ SOVERAN DA MARICOPA

L'Estat

Artical 1. La Provinçù Soveran da Maricopa isch ün membreu autonom es autogovernind dal naziun Talossan federal es empena alexhançù eternal à Sieu Maxhestà Rexhital, es àl Regipäts Talossan.

Artical 2. La nómina del estat isch la Provinçù Soveran da Maricopa. In el glheþ Angleasca, c'e the Sovereign Province of Maricopa.

Artical 3. La teritoria sacra es unremovaval dal Provinçù Soveran da Maricopa qomsistarha els cantons da Taglheria, Zuerieiria, Sandadia, es Ovestia, (in el glheþ Angleasca, Schneideria, Murphysboro, Prachelion, es Wesernia).

Artical 4. El capital zesterminat par statuteu.

Artical 5. El glheþ soleu þistoric es naziunal del popul Talossan entieir, es per aceasta raziun dal Provinçù Maricopan, isch el glheþ Talossan. El governamaintsch Maricopan reconeiçarha el glheþ Angleasca com'iens ün secund glheþ da traval útzil, es put adoptarh dels tierçais glheþen da traval par legeu.

Artical 6. El drapeu Provincial qomsista ün crutz trixheminat, virt pa biançéu pa crisomileu, sür ün campeu biançéu.

El Cleivi

Artical 7. Pevarh lexhislatïu in la Provinçù Soveran da Maricopa isch esferçat in el Cleivi. El Cleivi qomsistarha toct citaxhiens Maricopans qi volt tirh membrità in el corputz.

Artical 8. El Cleivi tischa el pevarh à validarh ingen proxhet ainciün legeu par üna maxhorità simpil da sieu membreux. El Premieir apraviarha ün avisamaintsch del pieriot da votind, à estarh zesterminat par legeu. Ingen membreu tischa ün amínt prescriut da temp in qi à zonarh sieu vota anaintsch el votind ferma.

El Premieir

Artical 9. El Premieir serà el duceu dal maxhorità in el Cleivi. O tischa el pevarh à emestarh proclamaziuns qe tienent el forziun d'iens legeu. Acestilor proclamaziuns povent estarh apialadas eda amendadas come legeux regulaes.

Artical 10. Ün noveu Premieir put estarh çoiçat à ingen temp par ün resoluziun aprovada par üna maxhorità del Cleivi, mas üna resoluziun electind ün noveu Premieir eda continuind el Premieir corentic in l'óifisch fost estarh aprovat par el Cleivi à mhíus viens fäts in ingen stancea dal Cosa naziunal.

El Governadeir Xheneral

Artical 11. El Governadeir Xheneral isch el representanteu del Regeu da Talossa, es com'acest, tischa el pevarh da impidamaintsch över toct legeux del Cleivi. El Governadeir Xheneral isch apüntat par el Regeu.

El Domnul-Senätsesc

Artical 12. Maricopa sè zelegäts àl Senäts serà cogneçat da din la Provinçù come el Domnul-Senätsesc. O serà selectat eftir els procedançeux traçats in el Legeu Orgänic.

Distribaziun del Pevarh

Artical 13. Svo àð aucün conflict d'intereçù put paßarh, eda svo àð aucün singul individual put rasqualarh la Provinçù in ün atentat infest, neviens put tirh ingen pü qe viens dels óifischen del Premieir, del Governadeir Xheneral, eda del Domnul-Senätsesc simultanmint, sanc el consint exprimat del Cleivi.

Xhusticia

Artical 14. El Cort Pü Inalt tischa juristiçal urixhinal à triarh toct cauças ariçinds sub legeu Maricopan.

Artical 15. Schi la populaziun dal Provinçù isch à mhíus 15 citaxhiens votinds, els partias à'iens cauça povent electarh à tirh lor cauça zecidada par üna Dierxhira da non míus qe 3 Maricopaes creada àl fost par el governamaintsch eftir procendançeux adoptats par legeu. El verdic d'ingen Dierxhira put estarh apialat, schi non ünanimös, àl Cort Pü Inalt.

Amendamaintschen

Artical 16. Aceasta Constituziun put estarh alteirada par üna resoluziun del Cleivi, qi fost estarh validada par ün referendüm dels popuis attainind el favour da tres simcalaisets dels voteirs, es zifamat par el Governadeir Xheneral.

Ratificaziun

Artical 17. Noi, els popuis da Maricopa, perventüra endorçent aceasta constituziun per el governamaintsch d'ár grült Provinçù es per aceasta raziun en cunsacrent à estarh el legeu pü chilseu d'ár fülca!